Lamentations 3

1Yimi umuntu olubonileyo usizi ngenxa yoswazi lokuthukuthela kwakhe.

2Ungixotshile wangiphumputhekisa emnyameni hatshi ekukhanyeni;

3ngempela usengiphendulele isandla sakhe waphindaphinda ilanga lonke.

4Usenze ijwabu lami laluphala, wangephula amathambo.

5Ungihanqile wangihonqolozela ngosizi langobunzima.

6Ungenze ngahlala emnyameni njengalabo abafa kudala.

7Ungihonqolozele ngenqaba ukuze ngingaphunyuki; ungibophe nko ngamaketane.

8Kuthi lanxa ngimemeza loba ngidinga usizo awuvalele phandle umkhuleko wami.

9Uvale indlela yami ngamatshe; wazombelezisa izindlela zami.

10Njengebhere licathamile, njengesilwane sicatshile,

11wangihudulela eceleni kwendlela wangifohloza wangitshiya ngingelamsizi.

12Wanweba idandila lakhe ngaba yikudla kwemitshoko yakhe.

13Wangiciba enhliziyweni ngemitshoko evela emxhakeni wakhe.

14Ngaba yinhlekisa ebantwini bakithi bonke; sengitshona ngiyingoma eyinhlekisa kubo.

15Ungigqibe ngemithi ebabayo wanginathisa inyongo.

16Ungihlafunise ukhethe ngamazinyo; ungigiqe ebhuqwini.

17Ngincitshiwe ukuthula; angisakwazi ingabe iyini impumelelo.

18Ngakho ngithi, “Sebuphelile ubucwazicwazi bami lakho konke engangikulindele kuJehova.”

19Ngikhumbula ukuhlupheka lokuntula kwami, ubumunyu lenyongo.

20Konke ngikukhumbula kamhlophe, umoya wami wephukile.

21Kodwa lokhu kuyafika engqondweni ngakho ngilalo ithemba:

22Ngenxa yothando olukhulu lukaJehova kasibhujiswanga, ngoba isihawu sakhe asipheli.

23Sitsha ukusa kwamalanga; kukhulu ukuthembeka kwakho.

24Ngiyazitshela ngithi, “UJehova uyisabelo sami; ngakho ngizalindela yena.”

25UJehova ulungile kulabo abathemba kuye, kulowo omdingayo;

26kuhle ukulinda ngokuthula, ukulindela insindiso kaJehova.

27Kuhle ukuthi umuntu alithwale ijogwe ngesikhathi esesemutsha.

28Kahlale yedwa ngokuthula, ngokuba uJehova ulibeke phezu kwakhe.

29Kembele ubuso bakhe ethulini – lingabe lisesekhona ithemba.

30Kaphe isihlathi sakhe kulowo ofuna ukummukula, agcwale ihlazo.

31Ngoba uJehova kabalahli abantu kuze kube nini lanini.

32Loba engaletha ubuhlungu, uyaveza uzwelo, lukhulu kangaka uthando lwakhe olungapheliyo.

33Akathandi ukukwehlisela mahlayana ukuhlupheka losizi ebantwaneni babantu.

34Ukuhlifiza ngezinyawo zonke izibotshwa elizweni,

35ukuncitsha umuntu amalungelo akhe phambi koPhezukonke,

36ukunganiki umuntu ukwahlulela okuhle – kambe uJehova uyabe engaziboni izinto ezinjalo na?

37Ngubani ongatsho ulutho lwenzakale uma lungavunyelwanga nguJehova na?

38Akuveli emlonyeni woPhezukonke ukuthi kuyehla izinhlupheko lezinto ezinhle na?

39Pho kungani umuntu ophilayo engasola nxa ejeziselwa izono zakhe na?

40Kasihloleni izindlela zethu sizilinge, kasibuyeleni kuJehova.

41Asiphakamiseleni izinhliziyo zethu lezandla zethu kuNkulunkulu ezulwini sithi:

42“Sonile sahlamuka njalo kawusithethelelanga.

43“Uzigubuzele ngolaka waxhumana lathi; ubhubhisile ungelazwelo.

44Uzisibekele ngeyezi ukuze kungafinyeleli mkhuleko kuwe.

45Usenze saba ngamanyala lengcekeza phakathi kwezizwe.

46“Izitha zethu zonke zivule imilomo yazo zezwakala zisihoza.

47Sesihlukuluzwe yikuthuthumela lokukhilikithela, ukudilika lokubhidlika.”

48Iziwohlo zezinyembezi ziyajuluka emehlweni ami ngokuba abantu bakithi babhujisiwe.

49Amehlo ami azajuluka kokuphela, engelakuphumula,

50iNkosi ize ikhangele phansi isezulwini ingibone.

51Engikubonayo kuthelela usizi emphefumulweni wami ngenxa yabesifazana bonke bomuzi wakithi.

52Labo ababa yizitha zami kungelambangela bangizingela njengenyoni.

53Bazama ukuquma impilo yami emgodini bangijikijela ngamatshe;

54amanzi asibekela ikhanda lami, ngabona ukuthi okwami sekuphelile.

55Ngalimemezela igama lakho, O Jehova, ngisekujuleni komgodi.

56Wezwa ukuncenga kwami: “Ungavali izindlebe zakho nxa ngikhalela ukwenyulwa.”

57Wasondela lapho ngikumemeza, wathi kimi, “Ungesabi.”

58Awu Jehova, wasamukela isikhalazo sami; wahlenga ukuphila kwami.

59Ubonile, awu Jehova, ububi obenziwe kimi. Ngisekela kulobubunzima!

60Usubonile ukujula kwezisongo zabo, amacebo abo wonke ngami.

61Awu Jehova, uzwile izinhlamba zabo, wonke amacebo abo ngami –

62ukunyenyeza lokungunguza kwabo ngami ukusa kwamalanga.

63Ake ubabone! Bahlezi kumbe bajamile, bayangihleka ngezingoma zabo.

64Awu Jehova, akubaphindisele ngokubafaneleyo, ngalokho okwenziwe yizandla zabo.

65Basibekele ngelembu ezinhliziyweni zabo, isethuko sakho sehlele phezu kwabo!

66Xhumana labo ngolaka ubabhubhise ngaphansi kwamazulu kaJehova.